បន្ទាយមានជ័យ ដោយ គឹមសាន ៖ ពលរដ្ឋនៅក្រុងប៉ោយប៉ែតថ្មីៗនេះ បានសម្តែងការខកចិត្ត និងរស់នៅក្នងសភាពភ័យខ្លាច និងអំពើចោរកម្មផ្សេងៗ ដែលកើតចេញពី បទល្មើស បង្កឡើងដោយ ក្រុមអ្នកបើកបនល្បែង ខុសច្បាប់ ភាគច្រើន ជាមន្ត្រីកងកម្លាំងប្រដាប់អាវុធ នៅក្រុងប៉ោយប៉ែតនេះតែម្តង ស្របពេលលោកអធិការ មិនហានចេញមុខបង្ក្រាប ។
ពលរដ្ឋដដែល បានបន្តនិយាយត្អូញត្អែ ប្រាប់អ្នកសារព័ត៌មានយើងថា បនល្បែងស៊ីសងនោះ រួមមាន ៖ ទី១ មេបនល្បែងសំបូរ អំណាច អាងបក្សពួកនិយម មានសែស្រឡាយជាអ្នកធំគ្រាក់ៗ គឺលោកវរសេនីយ៏ឯក ស៊ឹម សំអាត ប្រធានប៉ុស្តិ៍នគរបាល អន្តោប្រវេសន៍ច្រកទ្វារអន្តរជាតិប៉ោយប៉ែត មន្ត្រីរូបនេះបានឃុបឃិត បើកបនល្បែងស៊ីសងខុសច្បាប់គ្រប់ប្រភេទ នៅក្នុងផ្សាររាត្រីប៉ោយប៉ែត (ផ្សារអាណាន់ម៉ាឃិត) ទី០២ លោកអនុសេនីយ៍ឯក តែម ប៉ូឡា មេបញ្ជាការរងមូលដ្ឋាន កងរាជអាវុធហត្ថក្រុងប៉ោយប៉ែត ក៏បានបើកបនល្បែងភ្នាល់ប៉ាល់អនឡាញ នៅចំណុចជាប់ និងផ្ទះសំណាក់ផ្កាយ៣ ស្ថិតក្នុងភូមិក្បាលស្ពាន១ សង្កាត់ និងក្រុងប៉ោយប៉ែត ទី៣ ឈ្មោះ ប៊ុន ណាំអ៊ាង ហៅ បារាំង មានឋានជាមេបញ្ជាការរងកងរាជអាវុធហត្ថខេត្ត បន្ទាយមានជ័យ មន្ត្រីរូបនេះក៏បានយតាំងប្លុកកាសីណូផ្កាយប្រាំ ស្ថិតក្នងភូមិក្បាលស្ពាន១ ដើម្បីបើកបនល្បែងភ្នាល់បាល់អនឡាញ ខុសច្បាប់ យីហោHBO និងទី៤ ឈ្មោះ ធី ដើមពោធិ ជាអាជីវករមេបនល្បែងរូបនេះ បានយកឈ្មោះលោកវរសេនីយ៍ឯក ម៉ែន ភីរម្យ មេបញ្ជាការរងកងរាជអាវុធហត្ថខខេត្តបន្ទាយមានជ័យ ធើ្វជាខ្នងបង្អែក ដើម្បីបើកបនល្បែងភ្នាល់បាល់ខុសច្បាប់ នៅក្នុងភូមិបាលិលេយ្យ១នៅគៀកកិត ជាប់និងសាលាហូមហ្វ្រែន ក្រុងប៉ោយប៉ែត ក្បែរកែងខាងត្បូងវត្តបាលិលេយ្យ រីឯមេបនល្បែងទី៥ ឈ្មោះ វណ្ណ លីហោ មានឋានជាមេបញ្ជាការរងកងរាជអាវុធហត្ថខេត្ត បន្ទាយមានជ័យដែរ មេល្បែងរូបនេះ ក៏មិនណយដែរ គឺបានយកទីតាំងកាស៊ីណូរបស់លោកឧកញ៉ា កុកអាន បើកជាសង្វៀនជល់មាន់ ដាក់ភាគហ៊ុនគ្នា បើកអោយមានល្បែងបៀរអាប៉ោងខុសច្បាប់ សង្ស័យបញ្ឈឺប្រឆាំងនិងអនុសាសន៍ របស់សម្តេចអគ្គមហាសេនាបតិតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចបានបញ្ជា ឱ្យគ្រប់ស្ថាបន័អនុវត្តបិទបនល្បែងស៊ីសង ភ្នាល់គ្រប់ប្រភេទ នៅតាមមូលដ្ឋាននានា ជាដាច់ខាតកាលពីកន្លងមក។
ជាងនេះទៅទៀត រហូតសម្តេច ថែមទាំងបានធើ្វកំណែទម្រង់ បង្កើតបានជាគោលនយោបាយភូមិ ឃុំ មានសុវត្ថិភាពទាំង ០៩ ចំណុចនាពេលសព្វថ្ងៃនេះទៀតផង ។
បើទោះបីជា សម្តេចនាយកដ្ឋមន្ត្រី លោកបានប្រឹងប្រែងផ្តល់អនុសាសន៏ដ៏ល្អៗ ដើម្បីអោយមន្ត្រីថ្នាក់ក្រោមជាតិ អនុវត្តច្បាប់អោយមានប្រសិទ្ធិភាពក៏ដោយចុះ ក៏ពួកមេបនល្បែងស៊ីសងខុសច្បាប់ នៅក្រុងប៉ោយប៉ែតទាំងនេះ មិនបានខ្ចីញញើតកោតក្រែង និងគោរពតាមអនុសាសន៏ដ៏ថ្លៃថ្លា របស់សម្តេចនាយករដ្ឋមន្ត្រីកម្ពុជានោះឡើយ ។ ផ្ទុយទៅវិញ ក្រុមអ្នកបើកបនល្បែងស៊ីសងខុស និងច្បាប់កម្ពុជាអនុញាតនោះ បានសម្ញែងឫកពារដាក់ពលរដ្ឋទៀតផង ដោយកត្តាបែបហ្និងហើយ ទើបបងប្អូនប្រជាពលរដ្ឋនៅក្រុងប៉ោយប៉ែត មានការភ័យខ្លាចម្នាក់ៗ ដេកមិនលក់បក់មិនល្ហើយទេ ។ ហើយបានដាច់ចិត្ត មកពឹងពាក់អោយអ្នកសារព័ត៌មានយើង ចុះផ្សាយដើម្បីពាំនាំយកបញ្ហាអសកម្ម របស់ពួកមន្ត្រីគ្រាប់ល្ពៅស្ងោរ ទៅផ្តល់ជូនដល់ថ្នាក់ដឹកនាំខាងលើ ដើម្បីបានដឹងនិងពិចារណា ចំពោះការមិនបង្ក្រាបលើបនល្បែងខុសច្បាប់ នៅក្នុងមូលដ្ឋានក្រុងប៉ោយប៉ែតសព្វថ្ងៃនេះ ។
ពាក់ពន្ធ័និងបញ្ហានេះ លោកឧត្តមសេនីយ៏ត្រី មេបញ្ជាការកងរាជអាវុធហត្ថ ខេត្តបន្ទាយមានជ័យ គឺលោក ឱ បូរិន នាព្រឹកថ្ងៃទី២៥ សីហា ២០១៦ នេះ អង្គភាពសារព័ត៌មានយើងមិនទាន់អាចសុំអោយ លោកជួយបញ្ជាក់អំពីមូលហេតុ ដែលនាំអោយមន្ត្រីកងរាជអាវុធហត្ថ ក្នុងខេត្ត នៅក្រោមឱវាទរបស់លោក នាំគ្នាបើកបនល្បែងស៊ីសងខុសច្បាប់បាននៅឡើយទេ។
ដោយឡែក លោក អាត់ ខែម ស្នងការនគរបាលខេត្តបន្ទាយមានជ័យ ក៏មិនទាន់អាចសុំអោយលោកជួយបំភ្លឺបាននៅឡើយដែរ លើបញ្ហាដែលក្រុមអ្នក បើកបនល្បែងខុសច្បាប់ បន្តដំណើរការដោយត្រជាក់ចិត្តនោះ ប៉ុន្តែបញ្ហាខាងលើ ត្រូវបានប្រភពបែកធ្លាយលួចខ្សិបមកថា ៖ លោក អាត់ ខែម ទំនងជាត្រូវនិងវេទមន្តសន្តំ របស់មេបនល្បែងស៊ីសងនោះផងដែរ ទើបបានជាសុខចិត្ត ធើ្វគរធ្វើថ្លង់ មិនខ្ចីទប់ស្កាត់បទល្មើសទាំងនោះដូច្នោះ ។
សូមបញ្ជាក់ថា ៖ អំពើចោរឆក់ ចោរលួចប្លន់ បានកកើតមានស្ទើរតែរាល់យប់ថ្ងៃ នៅក្នុងមូលដ្ឋានក្រុងប៉ោយប៉ែតនេះ មិនចេះអស់មិនចេះហើយ ទេ ជាក់ស្តែង លោកស្នងការខេត្តបន្ទាយមានជ័យ គឺឧត្តមសេនីយ៍ទោ អាត់ ខែម ក៏លោកដឹងច្បាស់ រហូតនៅមិនសុខ និងសកម្មភាពឆក់ប្លន់នោះ ក៏មកចុះពិនិត្យស្ថានការណ៏ដោយផ្ទាល់ នៅតំបន់ប៉ោយប៉ែតកាលពីប៉ុន្មានថ្ងៃមុននេះ ។
ប៉ុន្តែបែបណាក៏ដោយ អ្វីដែលពលរដ្ឋលោកចង់បាននោះ គឺសកម្មភាពចុះបង្ក្រាបលើបនល្បែង ដែលបើកលេងដោយក្រុមសមត្ថកិច្ច នៅមូលដ្ឋាននេះតែម្តង ដើម្បីការពារសន្តិសុខ ជូនពួកគាត់ អោយស្របតាមគោលនយោបាយ ភូមិ ឃុំ មានសុវត្ថិភាព ទើបជាការល្អប្រសើរ ព្រោះសមត្ថកិច្ច ជាស្ថាបន័អ្នកអនុវត្តច្បាប់ ។
ពលរដ្ឋខាងលើមានសង្ឃឹមថា អាជ្ញាធរក្រុងប៉ោយប៉ែត និងខេត្តបន្ទាយមានជ័យ នឹងពិចារណាឡើងវិញ ចំពោះការទុកឱកាស អោយមានបនល្បែងស៊ីសងខុសច្បាប់ ដើម្បីគិតគួរដល់សុខសន្តិភាពជូនពលរដ្ឋ ៕
